Namazi i eklipsit
Myslimanët falin namaz të posaçëm gjatë eklipsit të diellit (kusúf) ose të hënës (husúf). Sipas këshillit për Çështje Fetare të Komunitetit Mysliman, gjatë kohës që ndodh eklipsi, besimtarët myslimanë falin një namaz të veçantë.
Ky namaz falet pa ezan e pa ikamet, të paktën dy rekate, individualisht ose me xhemat, duke bërë lutje dhe tesbih derisa eklipsi të përfundojë.
Ja njoftimi i plotë i këshillit për Çështje Fetare të KMSH:
Çfarë është namazi i eklipsit dhe si falet?
Eklipsit i diellit quhet “kusúf”, ndërsa eklipsi i hënës quhet “husúf”. Ditën kur ndërroi jetë Ibrahimi (r.a), i biri i të Dërguarit të Allahut (s.a.s), njëkohësisht ndodhi edhe eklipsi i diellit. Njerëzit nisën të thonë që dielli u errësua për shkak të vdekjes së të birit të Profetit (s.a.s.). Prandaj, Muhamedi (s.a.s.) tha:
“Hëna dhe Dielli janë dy nga shenjat e Allahut (që tregojnë ekzistencën dhe fuqinë e Tij). Ato nuk errësohen për shkak të vdekjes apo lindjes së askujt. Kur të shihni eklipsin e hënës ose të diellit, faluni dhe bëni dua derisa eklipsi të përfundojë.” (Buhari, Kusúf, 1, 15, etj; Muslim, Kusúf, 1-4, 10, 29; Nesáí, Kusúf, 10)
Kur ndodh eklipsi i diellit, falet namaz pa ezan dhe pa ikamet, të paktën dy rekate. Duke qenë se është nafile, mund të falet edhe katër a më shumë. Çdo dy apo katër rekate jepet selam. Mund të falet me xhemat, por edhe individualisht. Shumica e juristëve shprehen se është më mirë të falet me xhemat. Nëse falet me xhemat, imami reciton Kuran me zë dhe më gjatë se në namazet e zakonshme. Ndër sunetet e këtij namazi është edhe zgjatja e kijamit, rukusë dhe sexhdeve.
Sipas hanefive namazi i eklipsit falet porsi namazet e tjerë, pra me një kijam, një ruku dhe dy sexhde për rekat. Por sipas Imam Malikut, Shafiiut dhe Ahmed b. Hanbelit, ky namaz, ndryshe nga të tjerët, ka dy kijame, dy ruku dhe vijon si normalisht me dy sexhde. Në këtë rast bëhet një kijam dhe shkohet në ruku, pastaj ngrihesh përsëri dhe bën kijamin e dytë dhe shkon në rukunë e dytë. Pas rukusë së dytë bie në sexhde si në namazet e tjerë. Këtë e përsërit dy herë, duke plotësuar kështu dy rekate.
Pas namazit, imami ose personi individualisht bën dua në këmbë, i kthyer nga kibla, ose i ulur duke iu drejtuar xhematit.
Si kuptohet edhe nga hadithi, koha e këtij namazi është periudha sa zgjat eklipsi. Sipas hanefive, hanbelive dhe një transmetimi të Imam Malikut, nëse eklipsi përkon në vaktet mekruh, atëherë nuk falet. Në vend të namazit bëhet tesbih, istigfar dhe dua.
Kur ndodh eklipsi i hënës sipas Imam Shafiiut dhe Ahmedit veprohet në të njëjtën formë si në eklipsin e diellit. Por hanefitë dhe malikitë janë të mendimit që në rast të eklipsit të hënës, namazi falet individualisht, duke qenë se për këtë të dytën s’kemi praktikë të Profetit (s.a.s.). Allahu di gjithçka më së miri!
