Opinion nga Alban Çakalli
Plazhi i Llamanit sot.
Duke pritur turistin e gushtit
Çfarë po ndodh me turizmin në Mesdhe këtë vit?
Në pamje të parë duket sikur nuk ka shumë turistë, por në fakt po ndodh diçka shumë interesante. Sipas statistikave, europianët e Europës Veriore po i bëjnë pushimet herët, që në pranverë ose në muajit shtator-tetor. Si rezultat, në Maltë dhe Qipro këtë vit është regjistruar një rritje prej 16–19% e pushimeve bregdetare gjatë muajve të pranverës, krahasuar me vitin 2024.
Ky ndryshim ndodh për disa arsye:
- Biletat e avionëve janë më të lira në pranverë.
- Hotelet ofrojnë çmime më të favorshme dhe oferta tërheqëse.
- Gjermanët dhe anglezët nuk i preferojnë temperaturat mbi 38°C për pushime.
Pra, europianët po bëjnë pushime të zgjuara.
Po ne? A ofrojmë mundësi të tilla për turistët, si vendet e tjera të Mesdheut?
Fatkeqësisht, jo. Për shkak se sezoni ynë turistik është shumë i shkurtër, ne vazhdojmë të presim vetëm turistët e gushtit për të mbuluar të gjitha shpenzimet. Por ai turist i gushtit, pushimet i ka bërë tashmë që në prill ose maj.
