Ekosistemi teknologjik i Europës ndodhet në një udhëkryq, dhe nëse dëshiron të mbajë ritmin me përparimin global, kërkohet një investim i qëndrueshëm në fusha si teknologjia e klimës, inteligjenca artificiale (AI) dhe mbrojtja.
Kështu paralajmëron kompania e kapitalit rrezikues Atomico në raportin e saj vjetor “State of European Tech 2025”, duke theksuar se këto sektorë do të përcaktojnë dekadën e ardhshme të kontinentit.
Sipas raportit, Europa ka potencial të madh në formën e talentit dhe inovacionit, por i mungon përputhja midis ambicieve dhe angazhimit.
Ai bën thirrje për krijimin e kompanisë së parë europiane me vlerë një trilion euro. “Sovraniteti në teknologji nuk ka të bëjë me mbrojtjen, por me fuqizimin dhe zgjedhjen,” tha Tom Wehmeier, partner dhe kreu i inteligjencës në Atomico.
Të dhënat publike dhe një anketë me mbi 2,500 profesionistë të industrisë teknologjike hedhin dritë mbi zhvillimet e fundit.
AI është bërë motori kryesor i financimeve në Europë, duke përfituar 31% të kapitalit të mbledhur në vitin 2025. Investimi më i madh për këtë vit erdhi nga kompania franceze Mistral AI, e cila siguroi 2 miliardë dollarë (1.73 miliardë euro).
Rritje të konsiderueshme po përjeton edhe sektori i teknologjisë së mbrojtjes, me investime që arritën në 1.6 miliardë dollarë (1.38 miliardë euro) në vitin 2025.
Një e treta e kësaj shume shkoi për kompaninë gjermane Helsing, e cila përdor AI në sistemet e dronëve dhe nëndetëseve.
Raporti thekson gjithashtu se për të ruajtur vrullin e zhvillimit, Europa duhet të vazhdojë të tërheqë talentin më të mirë në fushën e AI.
Edhe pse numri i profesionistëve në këtë sektor është rritur me 22% çdo vit që nga 2016, Bashkimi Europian duhet të përforcojë përpjekjet për kërkimin dhe zhvillimin teknologjik.
“Nëse Europa nuk vepron tani, rrezikon të humbasë një mundësi historike për të udhëhequr epokën e ardhshme teknologjike,” paralajmëron Sarah Guemouri, zyrtare e Atomico. “Kjo është një sfidë – por edhe një shans unik për kontinentin.
