Moderatori i njohur shqiptar, Ermal Peçi, ka konfirmuar largimin e tij nga Radio Televizioni Shqiptar, duke bërë publike prapaskenat që çuan në ndërprerjen e programit të tij të së dielës. Përmes një postimi të gjatë në Instagram, Peçi ka hedhur dritë mbi një vendim të papritur dhe, sipas tij, të padrejtë: pezullimin e emisionit “E Diela Jonë” pa asnjë paralajmërim apo komunikim zyrtar nga drejtuesit e RTSH-së.
“Tani është koha për të folur,” shprehet Peçi, teksa thekson se ky nuk është një reagim për dramë, por për transparencë. Ai nënvizon se emisioni, i ndërtuar me pasion dhe profesionalizëm, ka qenë një ndër programet më të ndjekura në platformën publike dhe në rrjetet sociale, duke thyer rekorde audience dhe duke sjellë një frymë të re në transmetimet e fundjavës.
Por përkundër këtij suksesi, Peçi tregon se emisioni u pezullua në mënyrë të pashpjegueshme, pa ndonjë komunikim të drejtëpërdrejtë, pa justifikim ligjor dhe jashtë çdo norme profesionale. Ai shpreh qartazi zhgënjimin për mënyrën se si një institucion publik ka vendosur të heshtë një zë mediatik të dashur për publikun.
“RTSH nuk është pronë private,” thekson moderatori, duke risjellë në vëmendje misionin që një media publike duhet të ketë ndaj qytetarëve, informim, përfaqësim dhe transparencë. Sipas tij, ndërprerja e një programi mes sezonit pa një komunikim të qartë është jo vetëm një padrejtësi profesionale, por edhe një mungesë respekti ndaj publikut.
Në rrëfimin e tij, Peçi veçon faktin që “E Diela Jonë” ka sjellë për herë të parë në studiot e RTSH-së figura të rëndësishme publike dhe artistike, duke e shndërruar programin në një pikëtakim të vërtetë kulturor dhe mediatik. Mbyllja e këtij programi ngre pikëpyetje jo vetëm mbi vendimmarrjen brenda institucionit, por edhe mbi lirinë e krijimtarisë në mediat publike.
Ai premton se nuk do të ndalet dhe nuk do të heshtë, duke theksuar se e vërteta do të dalë në dritë shumë më shpejt nga sa pritet.
Në përfundim, Peçi u shpreh falënderues ndaj ndjekësve dhe mbështetësve të tij, duke e parë këtë kapitull jo si fund, por si një shtysë për të vazhduar më fort, me më shumë besim dhe më shumë arsye.
