Shumë vajza e gra, si Stefania nga Kolumbia, bien pre e premtimeve për një jetë më të mirë dhe përfundojnë të bllokuara në rrjetat e trafikimit, të detyruara të ushtrojnë prostitucion. Ajo kishte aplikuar për një punë si balerinë nate në Shqipëri, por përfundoi nën hetim për prostitucion, me pasaportën e bllokuar dhe pa ndihmë.
“Erdhëm për të kërcyer, por na detyruan të paguanim borxhe duke punuar si prostituta. Pranuam, me shpresën se do iknim pasi t’i shlyenim. Por kur tentuam të ktheheshim, na arrestuan në aeroport”, rrëfen Stefania.
Policia shqiptare ka zbuluar një skemë të re ku shtetase të huaja vijnë në Shqipëri për periudha të shkurtra dhe zëvendësohen nga të tjera, në një qarkullim të organizuar. Vetë vajzat pretendojnë se nuk janë prostituta dhe se janë mashtruar.
“Jemi nëna beqare nga Kolumbia. Kërkuam një mënyrë për të fituar para, por kur mbërritëm, kuptuam se kishim rënë në rrjet prostitucioni. Një nga personat që na solli është tashmë në burg”, shton Stefania.
Aktualisht, ato janë në pritje të gjykimit, pa dokumente, pa strehim dhe pa mjete jetese. “Kemi qenë dy muaj në paraburgim në Pogradec dhe dy të tjerë në Tiranë. Nuk na lejojnë të ikim. Jetojmë falë ndihmës së një fondacioni”, përfundon ajo.
