Deklarata epokale e influencers Enxhi Ruzhdia në emisionin “She is on Top” se “librin e kam si aksesor” ka ndezur rrjetin. Kush do ta kishte menduar? Libri, ky objekt i vjetër, i mbuluar me fjalë dhe ide, paskësh një funksion të ri: kombinim perfekt me rrobën e banjës dhe syzet e diellit.
Reagimet, siç pritej, nuk munguan. Disa e quajtën të cekët, të tjerë disi më dashamirës e quajtën të sinqertë. Por ndoshta duhet t’i themi gjërat siç janë: Enxhi nuk është problemi, ajo veçse verbalizoi një të vërtetë që të tjerët e fshehin pas filtrave. Sa herë kemi parë foto në Instagram me libër në dorë, që s’është hapur kurrë më shumë se për foton?
Ndoshta jemi thjesht xhelozë që librat po e bëjnë karrierën më mirë në Instagram sesa në bibliotekë. Por pyetja që mbetet pezull është: a kemi arritur në pikën ku leximi ka nevojë për marketing, dhe librat për ‘stylist’?
Apo thjesht jetojmë në kohën kur citatet e librave vlejnë sa një ‘caption’?
