Presidenti i Real Madridit, Florentino Pérez, thuhet se ka një synim të qartë për të ardhmen e stolit: Jürgen Klopp. Pas shkarkimit të Xabi Alonso-s, drejtuesit e “Galaktikëve” e emëruan me urgjencë Álvaro Arbeloa-n si trajner të ri, por sipas raportimeve, kjo lëvizje shihet më shumë si zgjidhje e përkohshme.
Sipas gazetarit Santi Aouna në rrjetin social X, Pérez e ka “planin A” sjelljen e trajnerit gjerman në “Santiago Bernabéu”, ndërsa Arbeloa duhet të tregojë me rezultate se e meriton vendin në krye. Raportohet se bordi i Realit është i vendosur të bëjë gjithçka për ta bindur Klopp-in të marrë drejtimin në të ardhmen.
Në të njëjtën kohë, Real Madridi po mban edhe alternativa të tjera në listë. Përveç Klopp-it, Enzo Maresca përmendet si një kandidat i mundshëm, nëse Arbeloa nuk bind dhe nëse negociatat me Klopp-in nuk ecin siç pritet.
Aktualisht, Jürgen Klopp nuk po trajnon një ekip. Ai mban një rol ekzekutiv te Red Bull Leipzig, ndërsa eksperienca e tij e fundit si trajner ishte te Liverpool, ku fitoi trofe madhorë si Champions League, Premier League, Superkupën e UEFA-s dhe Kupën e Botës për Klube.
