Transferimi i talentit brazilian Endrick te Olympique Lyon ka shkaktuar një furi të vërtetë mediatike në Francë, duke thyer rekorde shikueshmërie ende pa nisur stërvitjen e tij të parë, e cila është planifikuar për të hënën, më 29 dhjetor. Kjo “Endrickmania” është kthyer në një realitet të prekshëm, ku ardhja e tij shihet si një lëvizje strategjike për të siguruar rolin e titullarit dhe për të rritur shanset e tij për pjesëmarrje në Kupën e Botës me Brazilin këtë verë. Lojtari ishte koshient se qëndrimi në hije te Real Madridi nuk do ta ndihmonte të kapte skenën ndërkombëtare, ndaj vendosi të provojë veten te Lyon-i për të lënë gjurmë gjatë këtyre gjashtë muajve.
Impakti digjital i këtij transferimi ishte i menjëhershëm, pasi njoftimi i nënshkrimit të tij arriti mbi 16 milionë shikime në vetëm dy ditë, duke shkatërruar rekordin e mëparshëm të klubit prej 2.9 milionë shikimesh që mbahej nga një video e Tyler Morton. Vetë futbollisti, i njohur ndryshe si “Bobby”, postoi tre video në llogarinë e tij në Instagram të cilat së bashku kaluan shifrën e 30 milionë shikimeve. Fuqia e tij mediatike konfirmohet edhe nga numri i ndjekësve, ku me mbi 15.3 milionë fansa në Instagram, ai kalon figura të njohura të sportit botëror si Kevin Durant apo James Harden.
Përfaqësuesit e Roc Nation Sports theksojnë se pritshmëritë janë mjaft të larta, pasi pavarësisht minutave të pakta te Real Madridi, kontributi i tij në fushë mbetet ai i një lojtari të jashtëzakonshëm. Endrick konsiderohet tashmë një sensacion mediatik dhe një ambasador i fuqishëm markash, ku fushatat e tij reklamuese shoqërohen me koncepte si forca dhe suksesi, duke krijuar një lidhje autentike me publikun. Tashmë i gjithë ky vrull kulmon në Francë, ku Endrick synon të maksimizojë mundësitë e tij si sulmues kryesor për t’u rikthyer në qendër të vëmendjes së futbollit elitar.
