Lezhë – Një 50-vjeçar ka ndërruar jetë në ambientet e Institucionit të Ekzekutimit të Vendimeve Penale (IEVP) në Lezhë.
Ngjarja është konstatuar gjatë ndërrimit të shërbimit nga punonjësi i rolit bazë, i cili ka vënë re se i dënuari Sotir Shabani, i shtrirë në krevat, nuk po reagonte. Menjëherë është njoftuar mjeku i turnit, i cili, pas verifikimit, ka konstatuar se pacienti kishte ndërruar jetë.
Sotir Shabani, banues në Ballsh, Mallakastër, ishte akomoduar në IEVP Lezhë më datë 27.11.2021, për veprën penale “Dhunë në familje”, me masë mjekimi të detyruar.
Për rastin është hartuar dokumentacioni përkatës dhe janë njoftuar drejtuesit e institucionit, specialisti i SHKBB-së, Komisariati i Policisë Lezhë, si dhe Prokurori i gatshëm, për vijimin e procedurave ligjore.
Institucioni po bashkëpunon me autoritetet kompetente për sqarimin e plotë të rrethanave të këtij rasti.
