Erion Veliaj, Kryetari i Bashkisë së Tiranës, ka depozituar sot një kërkesë-padi në Gjykatën Administrative të Shkallës së Parë Tiranë ndaj institucionit të Presidentit të Republikës së Shqipërisë për periudhën 2007-2012, si dhe ndaj prokurorit të Posaçëm, Ols Dado. Ai kërkon të shpallet pavlefshmëri absolute e dekretit të emërimit të Dado si prokuror nga noter në vitin 2008.
Sipas dokumenteve të padisë, Veliaj argumenton se emërimi i Dado ka ndodhur në kundërshtim të hapur me ligjin, pasi ai në momentin e dekretimit nuk posedonte arsimimin e nevojshëm, përkatësisht diplomën e shkollës së Magjistraturës. Veliaj kërkon gjithashtu që Këshilli i Lartë i Prokurorisë të marrë masa për përfundimin e statusit të Dado si magjistrat dhe të shpallë ushtrimin e detyrës së tij si prokuror si të paligjshëm.
Në padinë e paraqitur, Veliaj thekson se të gjitha veprimet penale që janë ndërmarrë ndaj tij, përfshirë masat e sigurisë dhe kufizimet në ushtrimin e mandatit të tij si Kryetar i Bashkisë, janë të bazuara mbi një akt emërimi që ai e quan “nul ab initio” (i pavlefshëm nga fillimi). Kjo, sipas tij, ka shkaktuar pasoja të rënda për Bashkinë e Tiranës, Republikën e Shqipërisë dhe veçanërisht për rendin kushtetues, institucionet, si dhe për jetën personale të tij dhe familjes.
Kjo padi vjen në një moment të ndjeshëm dhe të tensionuar për politikën shqiptare, duke shfaqur një përplasje mes institucioneve dhe një injektim të ri në debatin mbi ligjshmërinë e emërimeve në sistemin e drejtësisë në vend. Me këtë veprim, Veliaj kërkon të vërë në pikëpyetje integritetin e procesit të emërimeve, që ka implikime të thella për drejtësinë, pushtetin vendor dhe ndjeshmërinë e opinionit publik ndaj institucioneve shtetërore.
