Policia e Shtetit ka bërë të ditur se pritet të finalizohen gjatë ditës së sotme procedurat për ekstradimin nga Dubai, Emiratet e Bashkuara Arabe, drejt Shqipërisë, të shtetasit Denis Brajoviç, 37 vjeç, një individ me rrezikshmëri të lartë shoqërore, i shpallur në kërkim ndërkombëtar.
Operacioni është zhvilluar në kuadër të aksionit ndërkombëtar policor të koduar “The Wanted” dhe është rezultat i bashkëpunimit të ngushtë ndërmjet Interpol Tiranës, Interpol Abu Dhabi dhe partnerëve në Emiratet e Bashkuara Arabe.
Brajoviç akuzohet për një sërë veprash penale të rënda, të kryera në kuadër të një grupi të strukturuar kriminal. Ndaj tij, Gjykata e Posaçme kundër Korrupsionit dhe Krimit të Organizuar ka lëshuar masën e sigurisë “Arrest në burg”, për veprat penale:
“Vrasja me paramendim” në formë bashkëpunimi nga grup i strukturuar kriminal, “Prodhimi dhe mbajtja pa leje e armëve luftarake dhe municioneve”, “Grupi i strukturuar kriminal”, “Kryerja e veprave penale nga grupi i strukturuar kriminal dhe organizata kriminale”, “Sigurimi i kushteve dhe i mjeteve materiale për të kryer vrasje”.
Operacioni “The Wanted” vijon me qëllim lokalizimin, arrestimin dhe ekstradimin e personave të shpallur në kërkim ndërkombëtar.
