Kryeministri Edi Rama ishte pasditen e kësaj të marte në Roskovec, ku në një takim me gratë kërkoi mbeshtetjen me votë për zgjedhjet e 11 majit.
Sipas tij, duke votuar PS-në, Shqipëria do futet në BE.
Gjatë fjalës së tij, Rama e quajti kryebashkiaken Majlinda Bufi një “Shtrigë”, duke thënë se vetëm një person me aftësi të tilla do të mund të realizonte ndryshimet që ka pësuar qyteti.
“Do t’u lutesha që deri në 11 maj të bëni çdo përpjekje, me të gjitha shoqet, krushkat, të njohurat, koleget, që gratë dhe vajzat shqiptare në radhë të parë ta marrin të tërin në dorë fatin europian të Shqipërisë dhe të marrin përdore të gjithë burrat dhe djemtë dhe një shumicë më e madhe se asnjëherë tjetër të vendosë për një Shqipëri Europiane.
Edhe një herë shumë respekt dhe komplimente për kryetaren e bashkisë suaj, një shtrigë që i është dashur kaq shumë këtij qyteti, sa po të shohësh nëpër qytet ndryshimet që janë bërë, vetëm një shtrigë mund t’i bënte, se nuk rrija dot pa e thënë”, tha Rama.
