Kryeministri Edi Rama ka reaguar ndaj deklaratave të forta të Ilir Vrenozit, një simpatizant i Partisë Demokratike, gjatë fjalës së tij në takimin elektoral të Sali Berishës në Korçë.
Gjatë fjalimit, Vrenozi përdori një gjuhë të ashpër dhe ofenduese ndaj kryeministrit. Ai u shpreh se më 11 maj Shqipëria do të rifitojë shpresën dhe do të nisë një “pranverë e madhe”, duke e cilësuar rilindjen dhe komunizmin si “pjella më e keqe e vendit”. Vrenozi theksoi se është një qytetar i thjeshtë dhe i varfër, i cili beson te ndryshimi dhe në ringjalljen e demokracisë.
Ai shtoi se Rama kishte tentuar ta “blinte”, por ai nuk ishte i shantazhueshëm: “U përpoq të më blinte ky karagjoz, por unë jam i djathtë dhe krenar. Nuk më përkul dot.” Më tej, ai e akuzoi kryeministrin për sjellje të pahijshme, duke iu referuar deklaratave të Ramës përballë fëmijëve.
Në përgjigje të kësaj deklarate, Rama reagoi me ironi në rrjetet sociale, duke e quajtur Vrenozin “1-shin e vërtetë të Partisë Demokratike”.
“Po pse kot e thashë që Vrenozi është 1-shi i vërtetë i PD-së! Shikoni si shpërthen një sallë të tërë me fjalorin e tij ekstrem dhe me fantazitë erotike që i adreson audiencës fanatike, kështu kuptohet më mirë se në çfarë kënete është kthyer PD-ja. Bufi s’e kap dot atë nivel ekstaze, as në ëndërr. Për mua, Vrenozi meriton kapelen e Bufit deri më 11 maj, e më pas edhe fronin e mbretit të kënetës. Po ju si mendoni?”, shkroi Rama me një ton tallës.
