Një studim i realizuar nga fondacioni gjerman “Friedrich Ebert” tregon se një në tre të rinj shqiptarë ka një dëshirë të fortë për t’u larguar nga vendi. Për më tepër, 11% e të rinjve mendojnë se do të largohen brenda gjashtë muajve të ardhshëm.
Arsyeja kryesore e këtij rezultati është kërkesa për një standard jetese më të mirë, pasuar nga dëshira për të pasur të ardhura më të larta, mundësi më të mëdha punësimi dhe një arsimim më cilësor.
Cilësia e arsimit në Shqipëri është identifikuar si një nga faktorët kryesorë që po i shtyn të rinjtë të mendojnë për emigrimin. Shumica e të rinjve nuk janë të kënaqur me sistemin arsimor, ndërsa perceptimi për korrupsionin në fushën e arsimit është alarmant.
Po ashtu, 27% e të rinjve të punësuar raportojnë se puna që kanë nuk është në përputhje me degën e studimeve të tyre, duke theksuar një mungesë të mundësive për zhvillim profesional në përputhje me arsimimin dhe interesat e tyre. Ky studim, i kryer në vitin 2024, përfshin rreth 700 të rinj të moshës 14-28 vjeç, dhe pasqyron shqetësimet e tyre në lidhje me të ardhmen dhe mundësitë që ofron Shqipëria.
