Ngjarja tronditëse në Frashër të Fierit, ku 20-vjeçarja Emanilda Rama vrau babain e saj me dhunë brutale dhe tentoi të fshehë krimin, ka hapur debat mes ekspertëve të shëndetit mendor.
Psikologët e lidhin aktin me një dëmtim të thellë psikologjik dhe marrëdhënie familjare të dështuar. Psikologia klinike Adelina Pjetra thotë se raste të tilla nuk janë vetëm krime, por tregues të traumave të rënda dhe dhunës së përsëritur brenda familjes.“Aty ku shoqëria sheh krim, psikologjia sheh simptomë.
Vajzat që kryejnë krime të tilla ndaj prindërve shpesh vijnë nga një histori e gjatë dhune fizike, psikologjike apo edhe abuzimi seksual”, shprehet ajo, duke e përshkruar autoren si njëkohësisht viktimë.
Ngjarja e fundit risjell në vëmendje edhe rastin e ngjashëm në Shën Vlash, Durrës, ku tre fëmijë, mes tyre Hygerta Meta, vranë babain, për shkak – sipas tyre – të autoritetit dhe dhunës që ai ushtronte.
Sipas ekspertëve, fëmijët e rritur në mjedise dhune shpesh e përjetojnë prindin si kërcënim. Frika dhe urrejtja, të akumuluara prej vitesh, mund të shpërthejnë në forma ekstreme.
“Kur dëgjon çdo ditë ‘do të të vras’, fëmija një ditë thotë: ‘Do të rritem dhe do të të vras unë’”, shton psikologia.
Megjithëse motivet konkrete të krimit të Emanildës dhe Hygertës mbeten për t’u hetuar plotësisht, specialistët ngrejnë alarmin për dështimin e gjithë strukturës familjare dhe mungesën e ndërhyrjes së hershme psikologjike në raste të tilla./TopChannel
