Këtë të premte në plazhin pranë zonës së Lungomares në Vlorë, dy shtetase ukrainase, nënë e bijë, rrezikuan mbytjen gjatë qëndrimit të tyre në det. Fatkeqësisht, pavarësisht përpjekjeve për shpëtim, nëna nuk ka mundur të mbijetojë dhe ka ndërruar jetë në spitalin rajonal të Vlorës. Trupi i saj pritet të dërgohet drejt morgut të Tiranës për shkak të faktit se është shtetase e huaj.
Vajza e saj ndodhet ende në gjendje të rëndë, nën kujdes intensiv dhe e intubuar.
Sipas dëshmive të pushuesve, ambulanca ka mbërritur me vonesë në vendngjarje, ndërsa ndërhyrja e parë u bë nga një qytetar. Fitim Bozheku, i cili punon si vrojtues në një plazh ngjitur, pa momentin kur të dyja po përballeshin me dallgët dhe ka hyrë menjëherë në det për t’u dhënë ndihmën e parë. Ai arriti t’i nxjerrë në breg nën gjendje kritike, duke shmangur një bilanc edhe më të rëndë.
Ngjarja ka tronditur pushuesit dhe ka rikthyer në vëmendje problematikat me sigurinë dhe shërbimet emergjente në plazhet shqiptare, veçanërisht në sezonin turistik. Autoritetet pritet të japin një njoftim zyrtar për rrethanat dhe përgjegjësitë e mundshme për vonesën e ndërhyrjes mjekësore.
