Klaus Gjasula do të jetë lojtari më i ri i Dinamos së Tiranës.
Mesfushori me tipare mbrojtëse, i njohur për stilin e tij agresiv dhe përvojën në futbollin gjerman, pritet të jetë përforcimi më i bujshëm i skuadrës për ndeshjet europiane.
Sipas “SuperSport”, Gjasula ka rënë dakord me klubin blu për një kontratë dyvjeçare, duke u bërë kështu pjesë e projektit të ri të Dinamos për sezonin e ardhshëm. Në moshën 35-vjeçare, ky do të jetë transferimi i tij i parë jashtë Gjermanisë, ku ka zhvilluar pjesën më të madhe të karrierës.
Më herët, ai kishte firmosur me ekipin gjerman Essen një kontratë që zgjaste deri në vitin 2026, por bashkëpunimi u ndërpre përpara kohe, duke i hapur rrugë këtij transferimi surprizë në Shqipëri.
Gjasula u bë i njohur edhe gjatë Kampionatit Europian të zhvilluar në Gjermani, ku vendosi një rekord të veçantë: u bë lojtari i parë në historinë e Europianëve dhe Botërorëve që shënon një gol dhe një autogol në të njëjtën ndeshje, një fakt që i siguroi vëmendjen e mediave ndërkombëtare.
Me këtë lëvizje, Dinamo tregon ambicien për të ndërtuar një skuadër të fortë për sfidat europiane, duke nisur me përvoja të tilla si ajo e Gjasulës.
