Kjo javë do të karakterizohet nga mot i paqëndrueshëm në të gjithë vendin. Sipas meteorologëve, dita e martë pritet të jetë më problematikja për shkak të reshjeve intensive të shiut dhe rikthimit të borës në zonat malore.
Meteorologia Lajda Porja bëri të ditur për mediat se ultësira perëndimore do të përfshihet nga reshje të dendura shiu, ndërsa në zonat veriore dhe verilindore do të rikthehen reshjet e borës.
Sipas parashikimeve, borë do të ketë gjatë gjithë ditës së martë në Bajram Curri, Pukë, Dibër, Bulqizë, Kukës dhe zona të tjera malore. Reshjet kanë nisur që në fundjavë dhe pritet të intensifikohen në orët në vijim.
Ndërkohë, temperaturat do të shënojnë rënie, sidomos vlerat minimale. Në zonat malore, termometri pritet të zbresë deri në 0 dhe -1 gradë Celsius, ndërsa maksimumet në rang vendi do të arrijnë 14–15 gradë.
Nga dita e mërkurë pritet një ndërprerje e përkohshme e reshjeve, por sipas meteorologëve, ato do të rikthehen sërish të enjten dhe të premten.
