Gjykata e Durrësit ka dhënë vendimin për tre fëmijët e Pëllumb Metës, i vrarë me armë zjarri nga familja e tij në shkurt të vitit të kaluar në Shënavlash të Durrësit.
Treshja e trupit gjykues e drejtuar nga Xhevdet Lika ka vendosur dënim me burg përjetë për djalin e madh të viktimës Hysen Meta, kurse vajza, Hygerta Meta, është dënuar me 8 vjet heqje lirie.
Me 5 vjet heqje lirie është dënuar djali i vogël i familjes Amarildo Meta, ndërsa bashkëshortja e Pëllumb Metës, Blerina Meta me 3 vjet heqje lirie.
Gjatë kohës që është dhënë vendimi, i pranishëm në sallë ka qenë vetëm Amarildo Meta.
Në ndryshim nga prokuroria e cila në pretencën e saj kërkoi dënimin e vajzës me 30 vjet heqje lirie, gjykata vlerësoi se Hygerta Meta nuk është fajtore për veprën penale të vrasjes, por vetëm për “Veprime që pengojnë zbulimin e së vërtetës” dhe “Fshehja dhe asgjësimi i kufomës.
Mbrojtja e ka kundërshtuar vendimin duke thënë se do ta apelojnë në një shkallë më të lartë gjykimi. Shqiponja Meta, avokatja e dy vëllezërve tha se priste një dënim më të butë për Hysen Metën.
“Ne do të ankohemi në Gjykatën e Apelit të Përgjithshëm në Tiranë, sidomos për sa i përket burgimit të përjetshëm të të pandehurit Hysen Meta. Unë mendoj që mund të kishte një masë më të butë dënimi. Amarildo Meta është dënuar me maksimumin e dispozitës për fshehje të kufomës. Do të ndjekim rrugët ligjore. Për aq sa ka bërë duhet të mbajë përgjegjësi ai që e ka kryer krimin. Nuk mund të mbajë përgjegjësi një familje e tërë. Burgimi i përjetshëm ka kushte për t’u ankimuar. Në kokën që ka kryer krimin ka qenë vetëm 24 vjeç, në kushtet e një dhune verbale që nga dita që ka lindur deri në ditën që ka realizuar vrasjen. Ai ka qenë i tronditur në kohën që ka kryer krimin. I ka dërguar Gjykatës një letër ku kërkon ndjesë. Motivi ka qenë dhuna e vazhdueshme”, tha avokatja.
Avokati tjetër që mbronte Hygerta Metën e ka pritur vendimin dhënë për të, e cila në total për dy vepra penale u dënua me 8 vjet heqje lirie.
“Vendimi i Gjykatës ishte i drejtë sa i përket të pandehurës Hygerta Meta”, tha avokati Kreshnik Poga.
Ngjarja e rëndë ndodhi të 10 shkurt 2024, ku Pëllumb Meta u qëllua me armë zjarri brenda shtëpisë nga djali i madh i tij Hysen Meta pas debateve familjare dhe më pas në bashkëpunim me pjestarët e tjerë të familjes, trupin e gopozën në kasollen e bagëtive.
