Sekretari i Përgjithshëm i Partisë Demokratike, Flamur Noka, deklaroi për Top Channel se PD nuk do t’i njohë këto zgjedhje, duke akuzuar Partinë Socialiste për manipulim të rezultatit.
“Këto zgjedhje nuk mund t’i pranojmë,” u shpreh Noka. “Qytetarëve duhet t’u shpjegohet se që nga viti 2017 e deri më sot, Edi Rama dhe regjimi i tij janë forcuar gjithnjë e më shumë, duke e fuqizuar financiarisht makinerinë elektorale të PS-së. A ka pasur ndonjëherë votë të lirë në Shqipëri?”
Noka theksoi se opozita nuk do të dorëzohet.
“Ne jemi të vendosur të mbrojmë demokracinë, edhe pse kjo nuk mund të bëhet vetëm nga opozita. Vota në kuti nuk është prekur dhe i jam mirënjohës komisionerëve dhe numëruesve që po e bëjnë punën me ndershmëri, duke numëruar çdo votë të demokratëve.”
Ai ngriti gjithashtu shqetësimin për përdorimin e patronazhistëve dhe presionin mbi qytetarët, duke pyetur: “Ku është SPAK? Në diasporë u është kërkuar që të votojnë dhe të dërgojnë edhe fotografi të votës.”
Deri më tani janë numëruar rreth 70% e votave, me Partinë Socialiste që ka siguruar 82 mandate, ndërsa Partia Demokratike ka fituar 52.
