Karim Benzema, në një intervistë të fundit me AS, ka diskutuar për situatën e tij aktuale dhe vendimet që duhet të marrë në të ardhmen. Ai ka konfirmuar se kontrata e tij me klubin është në fund, por nuk do të nxitohet në marrjen e një vendimi. “Është e vërtetë që kontrata ime po i merr fund. Nuk mund të them ende se çfarë do të bëj, nëse do të mbetem apo do të largohem – kjo varet nga shumë faktorë,” shprehet Benzema.
Ai do të mbushë 38 vjeç në muajin dhjetor dhe shpreh dëshirën për të vazhduar karrierën e tij për të paktën dy vite të tjera. Benzema vuri në dukje se ai dëshiron një vizion afatgjatë, jo një zgjatje të shkurtër vetëm për të vazhduar. “Do të shohim se çfarë do të ndodhë, çfarë mendon klubi. Më e mira për mua do të ishte të vazhdoj këtu, por jo vetëm për një ose dy vite,” tha ai.
Përveç kësaj, Benzema konfirmoi se ka oferta aktive nga klube europiane, por nënvizoi se komoditeti dhe respekti janë të rëndësishme, po aq sa dhe niveli i konkurrencës. “Është e vërtetë që kam oferta nga Evropa. Duhet të mendoj për gjithçka, të zgjedh me kujdes dhe të shoh se ku ndihem mirë. Nuk duhet harruar se ndjehem rehat këtu dhe marr dashurinë e të gjithëve,” tha ai.
Benzema theksoi se nuk ka ndërmend të ndalojë së luajturi futboll ose së konkurruari në gjashtë muajt e ardhshëm, duke lënë të hapur mundësinë e një vendimi të qartë dhe të menduar. Ai preferon bisedat ballë për ballë me drejtuesit e klubit për të diskutuar të ardhmen e tij.
Kjo situatë ka tërhequr vëmendjen e shumë tifozëve dhe analistëve të futbollit, pasi Benzema është një figurë kyçe në botën e futbollit dhe vendimi i tij do të ndikojë ndjeshëm në karrierën e tij dhe në klubin që zgjodhi për të vazhduar aventurën e tij.
