Dy persona janë shpallur në kërkim për krime zgjedhore në Kukës.
Policia e Kukësit njofton se, në bashkëpunim me Prokurorinë e Posaçme (SPAK), ka kryer kontrolle në banesat e shtetasve Gazmend Peposhi dhe Kalosh Peposhi, në kuadër të hetimeve për veprën penale të “Korrupsionit aktiv në zgjedhje”, të kryer në bashkëpunim.
Pavarësisht se ata nuk janë gjetur në banesat përkatëse, ata janë shpallur në kërkim dhe policia e Kukësit po punon për arrestimin e tyre. Sipas raportimeve, Gazmend dhe Kalosh Peposhi dyshohet se kanë ofruar para për të orientuar votat në favor të një subjekti politik.
Njoftimi i policisë:
Kukës
Strukturat e posaçme për hetimin e krimeve zgjedhore në Drejtorinë Vendore të Policisë Kukës në bashkëpunim të ngushtë me Prokurorinë e Posaçme Kundër Korrupsionit dhe Krimit të Organizuar (SPAK), ka ushtruar kontrolle në banesat e shtetasve G.P dhe K.P në kuadër të hetimeve për veprën penale ”Korrupsioni aktiv në zgjedhje”, kryer në bashkëpunim, parashikuar nga nenet 328 e 25 te K.Penal.
Policia e Kukësit ka shpallur në kërkim shtetasit G.P dhe K.P, dhe vijon puna intensive për kapjen e tyre.
Strukturat hetimore të DVP Kukës nën drejtimin e SPAK po punojnë intesivisht me qëllim identifikimin e shtetasve të tjerë ndaj të cilëve ka dyshime se janë dhënë vlera monetare për orientimin e votës së tyre ndaj një subjekti politik.
