Sistemi Europian i Informacionit për Zjarret në Pyje pohon se që nga fillimi i vitit, zjarret kanë djegur 227.000 hektarë tokë – më shumë se dyfishin e mesatares për këtë periudhë gjatë dy dekadave të fundit.
Megjithëse kjo shifër është shumë mbi mesataren, nuk është rekordi më i lartë në regjistrimet e EFFIS-it, që datojnë nga viti 2002. Evropa përjetoi sezonet më të këqija të zjarreve në vitet 2003 dhe 2017, kur ato dogjën mbi 1.100.000 hektarë në secilin prej këtyre dy viteve – një sipërfaqe kjo e barabartë me ishullin e Xhamajkës.
Nuk dihet ende nëse 2025-a do të jetë një vit i rekordeve, pasi kjo varet nga mënyra se si do të vijojë sezoni i zjarreve në muajt në vijim. Por numri i zjarreve në Europë rezulton për çdo rast të jetë rritur ndjeshëm këtë vit, me 1.118 të tilla të regjistruara deri më 8 korrik, krahasuar me 716 në të njëjtën periudhë të vitit të kaluar.
Për më tepër vala e nxehtësisë në kontinentin e vjetër këtë muaj ka nxitur zjarre masive në rajonin e Mesdheut, përfshirë Sirinë, ku ato dogjën më shumë se 3% të mbulesës pyjore të vendit, sipas OKB-së. Shkencëtarët thonë se verat më të nxehta dhe më të thata në këtë rajon e bëjnë atë shumë të rrezikuar nga zjarret në natyrë.
Këtë rrezik e rrisin edhe ndryshimet klimatike. Në vendet që kufizohen me detin Mesdhe, ato kanë ndikuar që sezoni i zjarreve të nisë më herët vitet e fundit, të thyhen rekorde për intensitetin e flakëve dhe të digjet më shumë tokë.
Sipas Organizatës Botërore të Meteorologjisë, që nga vitet 1980, Europa është ngrohur dy herë më shumë sesa mesatarja globale. Sipas EFFIS-it, temperatura më të ngrohta se mesatarja parashikohen në të gjithë Evropën gjatë gushtit, që do të thotë se rreziku i zjarreve do të mbetet i lartë në shumë pjesë të Evropës jugore dhe lindore.
