Një ngjarje e rëndë me dy viktima është regjistruar pas mesnate në Manëz të Durrësit. Rreth orës 01:45 të datës 22 tetor, pranë një karburanti, një konflikt i nisur për motive ende të paqarta ka përfunduar me përdorimin e armëve të zjarrit.
Si pasojë e të shtënave kanë humbur jetën shtetasit A. K., 23 vjeç, dhe F. P., 33 vjeç, të dy banues në Manëz. Nga hetimet paraprake dyshohet se F. P. është vrarë nga D. P., 21 vjeç, ndërsa A. K. dyshohet se është qëlluar nga F. P..
Policia po vijon kontrollet për kapjen e 21-vjeçarit D. P., ndërsa një grup i posaçëm hetimor, nën drejtimin e prokurorit, ndodhet në vendngjarje për të zbardhur plotësisht rrethanat e krimit dhe për të identifikuar çdo person tjetër të përfshirë.
