Dy shtetas sirianë janë gjetur të plagosur me thikë më 11 dhjetor 2025 në fshatin Koshuticë të Leposaviqit, në një rast që autoritetet po e hetojnë si vrasje në tentativë.
Njëri prej tyre, një burrë rreth të 40-ave, u gjet i shtrirë në oborrin e një shtëpie nga dy banore kosovare, të cilat njoftuan se ai kishte plagë të shumta të shkaktuara nga një mjet i mprehtë. Ai u dërgua fillimisht në Spitalin e Mitrovicës Veriore dhe më pas në atë të Mitrovicës Jugore për trajtim të specializuar.
Viktima e dytë, një 27-vjeçar sirian, u gjet nga Policia gjatë patrullimit në të njëjtin fshat. Rreth orës 11:05, një njësi e SPMK Jarinje raportoi se kishte vërejtur të riun me lëndime në kokë dhe këmbë, po ashtu të shkaktuara nga një mjet i mprehtë. Ai ka deklaruar se sulmuesi ishte arratisur në drejtim të kufirit me Serbinë. Edhe ky i plagosur u transportua në Spitalin e Mitrovicës Jugore për trajtim të mëtejshëm.
Policia ka nisur hetimet për zbardhjen e plotë të rastit dhe identifikimin e të dyshuarit.
