Dy aksidente të njëpasnjëshme janë regjistruar në orët e para të mëngjesit të sotëm në autostradën “Tiranë-Durrës”.
Një 28-vjeçar duke drejtuar makinën e tij ka humbur kontrollin dhe është përplasur me trafikndarësen. Pasi është përplasur, shoferi bashkë me tre pasagjerë në mjet kanë dalë nga makina dhe në momentin që po qëndronin në rrugë, janë përplasur nga një tjetër makinë me drejtues personin me iniciale I. L.
Si pasojë shoferi 28-vjeçar ka humbur jetën, ndërsa 3 pasagjerët janë dërguar në spital për ndihmë mjekësore. Ndërkohë shoferi i mjetit tjetër I.L, është shoqëruar në komisariat për veprime të mëtejshme proceduriale.
Njoftimi i Policisë:
Rreth orës 05:05, në autostradën “Tiranë-Durrës”, shtetasi G. M., rreth 28 vjeç, duke drejtuar automjetin, ka humbur kontrollin mbi drejtimin e tij dhe si pasojë automjeti është përplasur me trafikndarësen.
Pasi ka dalë dalë nga automjeti, bashkë me 3 pasagjerët, gjatë kohës që qëndronin në rrugë, ata janë përplasur nga automjeti me drejtues shtetasin I. L.
Për pasojë, shtetasi G. M. ka humbur jetën, ndërsa 3 pasagjerët e automjetit të tij janë dërguar në spital, për mjekim.
Shtetasi I. L është shoqëruar në Komisariat, për veprime të metejshme proceduarale.
Grupi hetimor vijon punën për sqarimin e rrethanave të aksidentit.
