Profesori universitar Bujar Dugolli ka komentuar vendimin e fundit të Gjykatës Kushtetuese të Kosovës, duke theksuar se ai ka sqaruar situatën rreth përfaqësimit të komuniteteve në institucionet kosovare dhe ka eliminuar keqkuptimet për rolën e Listës Serbe. Dugolli shprehu se, nëse nuk arrihet një marrëveshje për një koalicion stabil, një zgjidhje alternative mund të jetë formimi i një qeverie të pakicës, e cila do të mundësonte kalimin e buxhetit dhe ratifikimin e marrëveshjeve ndërkombëtare para zgjedhjeve të parakohshme.
Sipas tij, vendimi i Kushtetueses e sqaron se Lista Serbe ka të drejtën për të propozuar përfaqësues të komunitetit serb, por nuk ka monopol mbi këtë proces. Ai e përshëndeti votimin e Nenad Rashiqit nga Lidhja Demokratike e Kosovës (LDK) si nënkryetar të Kuvendit, duke e konsideruar një hap të rëndësishëm drejt konstituimit të institucioneve. Dugolli e vlerësoi zgjedhjen e Rashiqit si konform kushtetutës, duke theksuar se Kuvendi s’ka pasur alternativë tjetër për të filluar punën e tij.
Më tej, ai i bëri thirrje komunitetit serb që të mos ndjekë verbërisht një parti, por të jetë më proaktiv në jetën politike. Dugolli parashikon se pas zgjedhjeve vendore, partitë politike do të kenë mundësi të reflektojnë mbi ndërtimin e një koalicioni të gjerë e stabil, ose në rast të dështimit, të shkojnë në zgjedhje të reja. Ai theksoi se nëse nuk arrihet ndonjë marrëveshje, është e nevojshme të krijohet një qeveri e pakicës me qëllim që të diskutohen dhe miratohen ligjet e nevojshme, sidomos Ligji për Buxhetin, përpara fundit të vitit.
Dugolli përfundoi duke theksuar se interesi nacional kërkon veprime të shpejta për të stabilizuar qeverinë bërë të mundur miratimin e ligjeve dhe kalimin e marrëveshjeve ndërkombëtare, para se të organizohen zgjedhjet në pranverë, duke e cuar vendin drejt stabilitetit dhe zhvillimit të duhur politik.
