Gjyqtari i GJKKO Erjon Bani si dhe kreu i SPAK, Altin Dumani janë vënë sot përpara mediave dhe Shoqërisë Civile në organizimin e “Qendra për studimin e drejtësisë” në kuadër të Tryezës së Drejtësisë për të komentuar vijueshmërinë e insitucionit, si dhe për të publikuar rezultatet e deritanishme të goditjes së korrupsionit në nivel shtetëror dhe veprave të tjera kriminale.
Gjyqtari Erjon Bani është shprehur se produktiviteti i Strukturës së Posaçme Kundër Korrupsionit dhe Krimit të Organizuar është mbi 99%, ndërsa referuar kapacitetit të gjyqtarëve, ai shton se për të arritur objektivat duhet të punojmë shtatë ditë të javës, edhe jashtë orarit zyrtar.
Erjon Bani, gjyqtar i GJKKO: Drejtësia është thjesht shërbim. Jemi thuajse në gjysmën e kapacitetit të gjyqtarëve. Produktiviteti i GJKKO-së është mbi 99 përqind. Cilësia e çështjeve është e lartë. Nuk kemi as ndihmës ligjorë dhe gjyqtarët për të arritur objektivat, duhet të punojnë shtatë ditë, edhe jashtë orarit zyrtar.
Ne publikojmë të gjitha vendimet që marrim. Kushdo mund të shkojë në gjykata.gov.al dhe i ka të gjitha vendimet online, në shërbim të transparencës. Falënderojmë edhe partnerët tanë për mbështetjen që na kanë dhënë.
