Kosova rrezikon të humbë rreth 200 milionë euro nga marrëveshjet me Bashkimin Evropian dhe Bankën Botërore, si pasojë e dështimit të formimit të një qeverie të re dhe organizimit të zgjedhjeve të parakohshme pa ratifikimin e këtyre marrëveshjeve. Zvarritjet në krijimin e institucioneve qeveritare mund të çojnë në një kolaps financiar, i cili do të ndikonte drejtpërdrejt në pagat, pensionet, dhe funksionimin e organeve themelore të shtetit.
Blendi Hasaj, drejtor i Institutit GAP, thekson se vonesat në fillimin e zbatimit të kredive rriskojnë seriozisht humbjen e fondeve. Ai shpjegoi se mosratifikimi i marrëveshjeve me Bashkimin Evropian për Planin e Rritjes ka penguar arkëtimin e parapagesës dhe disbursimin e këstit të parë, duke vënë në rrezik besimin e qytetarëve dhe Bashkimit Evropian ndaj institucioneve kosovare në procesin e integrimit evropian.
Nëse zgjedhjet zhvillohen në dhjetor, Kosova mund të hyjë në vitin 2026 pa një buxhet të miratuar. Sipas Ligjit për Menaxhimin e Finacave Publike, mund të ndodhi një zgjatje buxhetore për dy muajt e parë të vitit fiskal duke u bazuar në buxhetin e vitit të kaluar, por çdo zgjatje për muajin mars kërkon miratimin e Kuvendit. Ndërkohë, shoqëria civile bën thirrje për bashkëpunim mes partive politike për të shmangur rreziqet financiare.
Ekonomisti Berim Ramosaj theksoi se Kuvendi ka kompetenca për të shmangur një kolaps të tillë dhe mund të propozonte një zgjatje buxhetore, e cila do të ishte një qasje e arsyeshme në këtë situatë emergjente. Ai sugjeroi se financimi i përkohshëm, i njohur si “financim i përkohshëm”, mund të realizohet përmes një pikë të rendit të ditës në Kuvend, pasi kjo nuk është në kundërshtim me Kushtetutën.
Aktualisht, është në dorë të presidentes që të kërkojë miratimin e kësaj zgjatje nga deputetët para shpërndarjes së Kuvendit. Nëse institucionet nuk formohen deri në mars, arka e shtetit do të bllokohet, duke rrezikuar pagesat për shërbyesit publikë, pensionet, ndihmat sociale dhe funksionimin e organeve të rendit dhe sigurisë.
