Gazetarja Anila Hoxha, e ftuar mbrëmjen e sotme në emisionin Top Story, ka zbardhur detaje të reja mbi hetimet në lidhje me dosjen e Universitetit Bujqësor të Tiranës, që çuan në lëshimin e 24 masave ndaj zyrtarëve të këtij institucioni nga SPAK, ndërsa katër prej tyre janë lënë në arrest nga GJKKO sot.
Hoxha shpjegoi se hetimet nga SPAK kanë nisur në vitin 2022 për shkak të dyshimeve për abuzime me tenderët në këtë universitet. Sipas gazetares, ekzistojnë dyshime të arsyeshme se janë kryer abuzime edhe me dieta dhe trajnime për fermerët, të cilat do të vërtetohen përmes hetimeve nëse janë realizuar apo jo.
“Ajo që dyshohet është se ka pasur abuzime edhe me dietat për trajnime për veterinerët. Janë regjistruar këto aktivitete, por ende nuk dihet nëse fermerët janë trajnuar siç thuhet. Ka edhe një shprehje: ‘Fryji faturat që të fitojmë edhe ne’. Këto janë fonde të universitetit”, tha Hoxha. Ajo shtoi se hetimi vazhdon dhe është duke u shqyrtuar çdo procedurë, ndërkohë që kulmi i hetimeve ka nisur në vjeshtën e vitit 2022.
Gazetarja tregoi gjithashtu se në mars 2022, ajo vetë kishte realizuar një shkrim investigues, ku zbuloi se disa pajisje laboratorike ishin blerë me çmime shumë më të larta se sa ato që ishin në treg. “Një pajisje që kishte një vlerë prej 1 milion lekësh të vjetra ishte blerë për më shumë se sa ajo që mund të gjendej në dyqane për 60 mijë lekë të vjetra”, tha Hoxha. Ajo përmendi gjithashtu blerjen e pajisjeve të tjera, si blender dhe shtrydhës frutash, për çmime të tejkaluara.
Hoxha theksoi se pas publikimit të këtyre informacioneve kishte pasur reagime nga institucionet dhe hetimi kishte vijuar, duke kulmuar me sekuestrimin e telefonave në shtator të vitit 2022. Ajo shtoi se dyshimet janë të arsyeshme deri tani, dhe se SPAK ka marrë informacionet e nevojshme nga policinë dhe krimin financiar. Rektori i universitetit, sipas saj, është vëzhguar nga agjentët e BKH gjatë kërkesës për një takim me një nga subjektet e dyshuara, ku janë bërë edhe përgjime ambientale.
