Gianluigi Donnarumma, tashmë portier i Manchester City-t dhe kapiten i Italisë, është më i bindur se kurrë për të ardhmen e “Azzurrëve”: “Këtë herë, Italia do të jetë në Kupën e Botës. Nuk ka më dilema apo frikë. Jemi gati.”
Pas dy mungesave të dhimbshme në turnetë botërorë, Donnarumma beson se puna e Rino Gattusos ka rikthyer shpirtin dhe krenarinë te kombëtarja. “Nuk do të ndodhë për herë të tretë. Kemi mësuar nga e kaluara dhe tani jemi një grup i bashkuar. Kur të vijë koha e ‘playoff’-eve, do të jemi gati.”
Portieri foli edhe për eksperiencën e tij në Premier League: “Në Angli vrapohet shumë, nga fillimi në fund, por kjo nuk do të thotë se është më mirë se Serie A. Janë dy stile të ndryshme, por futbolli italian ka ende shumë cilësi.”
Në lidhje me garën për titull në Itali, Donnarumma shprehu admirimin për klubin e zemrës: “Milani më pëlqen shumë. Kam folur me njerëz që njohin mirë ambientin dhe më kanë thënë se aty ka besim dhe energji pozitive. Ata e meritojnë Scudetton.”
Kapiteni italian nuk la pa përmendur as Pep Guardiolën, trajnerin e tij te City: “Kur e dëgjon të flasë, mbetesh i mahnitur. Çdo fjalë e tij është mësim. Jam me fat që punoj me të dhe dua të qëndroj në Manchester sa më gjatë.”
Në fund, Donnarumma vlerësoi Gattuson për ndikimin e tij te kombëtarja: “E ndjej gjithmonë pranë në çdo moment të lojës. Ai flet shumë, shpjegon gjithçka, dhe na ka dhënë sërish identitetin që na mungonte.”
Italia e Gattusos synon Botërorin 2026 me një objektiv të vetëm: të rikthehet në majë dhe të tregojë se pas çdo dështimi, vjen një rilindje.
