Gianluigi Donnarumma mund të rikthehet në Serie A, por jo te Milan, por te rivalët e tyre të betuar, Inter. Sipas raportimeve nga “Sky Sport”, Inter ka shfaqur interes për Donnarumman si një mundësi për merkaton e verës së ardhshme. Edhe pse aktualisht mbetet një thashethem dhe jo një negociatë konkrete, ky skenar ka tërhequr shumë vëmendje.
Portieri italian ka kontratë me PSG deri në vitin 2026, por duket se marrëdhënia e tij me trajnerin Luis Enrique nuk është më e mira. Për më tepër, blerja e portierit rus Matvey Safonov gjatë verës për 20 milionë euro ka krijuar një situatë të vështirë për Donnarumman. Nëse situata mes tij dhe klubit nuk përmirësohet dhe nuk ndodh rinovimi i kontratës, largimi mund të jetë një opsion i mundshëm.
Një mundësi e artë për Interin
Inter po kërkon stabilitet në portë dhe mund të përfitojë nga situata e ndërlikuar e Donnarummas te PSG. Yan Sommer, i cili zëvendësoi Onanën, duket se po i afrohet fundit të aventurës me zikaltërit për shkak të moshës dhe performancës. Në këtë situatë, Donnarumma do të ishte një përforcim i shkëlqyer për skuadrën e Simone Inzaghit.
Në rast të transferimit, Donnarumma do të gjente një ambient të njohur te Interi, ku luajnë disa nga shokët e tij të kombëtares italiane, si Dimarco, Barella dhe Bastoni. Një tjetër figurë e rëndësishme për të është Gianluca Spinelli, trajneri i portierëve te Inter, me të cilin ka punuar gjatë kohës te PSG.
Pengesa financiare
Për t’u rikthyer në Serie A dhe për të veshur fanellën e Interit, Donnarumma duhet të bëjë disa sakrifica. Aktualisht, ai përfiton një pagë prej 10 milionë euro neto në vit, përfshirë bonuset, një shifër që Inter nuk mund ta përballojë. Nëse portieri pranon ulje page, atëherë marrëveshja mund të jetë e mundur. Përveç kësaj, PSG do të kërkojë një tarifë të konsiderueshme transferimi për ta lënë të lirë portierin.
Periudha e ndërlikuar në Paris
Donnarumma u largua nga Milan në vitin 2021 si lojtar i lirë, por periudha e tij te PSG ka qenë e ndërlikuar. Edhe pse ka fituar shtatë trofe në Francë, përfshirë tre kampionate dhe një Coupe de France, ai ka qenë shpesh objekt kritikash për gabime vendimtare dhe mungesën e stabilitetit të plotë në portën e PSG-së.
Marrëdhënia e tij me tifozët parisienë ka qenë shpesh e tensionuar, ndërsa konkurrenca brenda skuadrës ka vënë në pikëpyetje pozicionin e tij titullar. Një rikthim në Serie A mund të jetë një hap i rëndësishëm për të rifituar formën më të mirë dhe për të gjetur stabilitetin që kërkon.
Një lëvizje strategjike për Interin
Drejtori sportiv i Interit, Giuseppe Marotta, është i njohur për aftësinë e tij për të përfituar nga mundësitë e mira në treg. Transferimi i Donnarummas mund të jetë një lëvizje strategjike për klubin zikaltër. Për më tepër, suksesi i Hakan Çalhanoglu, një tjetër ish-lojtar i Milanit, te Interi mund të shërbejë si një shembull frymëzues për Donnarumman.
Tashmë mbetet për t’u parë nëse Inter dhe Donnarumma do të gjejnë gjuhën e përbashkët dhe nëse ky transferim i bujshëm do të bëhet realitet.
