Donald Trump ka përfunduar fjalimin e tij inagurues, i cili ishte një përzierje sulmesh ndaj administratës së mëparshme demokrate dhe premtime për një të ardhme më të ndritur.
Ndërsa ish-Presidenti Joe Biden dhe demokratë të tjerë qëndronin seriozë pas tij, Trump pretendoi se kishte marrë një mandat për të përmbysur atë që e quajti “një tradhti të tmerrshme” ndaj kombit. Ai sulmoi “një sistem radikal dhe të korruptuar që ka zhveshur kombin tonë nga pushteti dhe pasuria.”
“E gjithë kjo do të ndryshojë duke filluar nga sot,” deklaroi ai.
Trump kaloi më pas tek planet e tij konkrete, duke përmendur një sërë veprimesh ekzekutive mbi imigracionin dhe energjinë dhe duke premtuar përfundimin e programeve të diversitetit të mandatuara nga qeveria. Ai përsëriti premtimin e tij për të ndryshuar emrin e Gjirit të Meksikës në “Gjiri i Amerikës” dhe për të rikthyer Kanalin e Panamasë.
“SHBA do të konsiderojë sërish veten një komb në rritje,” theksoi ai, duke premtuar të rrisë pasurinë amerikane dhe të zgjerojë “territorin tonë.”
Këto deklarata të fundit ka të ngjarë të ngjallin shqetësime tek aleatët ndërkombëtarë, të cilët tashmë janë prekur nga interesimi i Trump-it për të blerë Groenlandën dhe nga batutat e tij për ta bërë Kanadanë shtetin e 51-të të SHBA-së.
Gjatë fushatës dhe në këtë fjalim, Trump ka dhënë një sërë premtimesh të mëdha. Tani që ai është president, sfida e tij do të jetë t’i realizojë këto premtime dhe të tregojë se çfarë nënkupton vërtet “epoka e artë” që ai shpall.
