Gjatë një takimi me qytetarë, Taulant Balla, drejtuesi politik i Partisë Socialiste për Diasporën, theksoi se qeverisja e PS-së ka sjellë përfitime të dukshme për bizneset e vogla, veçanërisht në aspektin fiskal. Ai rikujtoi se në vitin 2013, këto biznese përballeshin me një ngarkesë të rëndë tatimore, përfshirë 20% TVSH dhe 10% taksë të sheshtë. Ndërsa sot, sipas Ballës, falë politikave të qeverisë së Edi Ramës, ato përfitojnë nga një regjim i “zero taksave”, i cili do të zgjasë deri në vitin 2029.
“Po t’ju kujtoj një shembull konkret: ky biznes i vogël ku ndodhemi sot paguante 30% taksa në total në vitin 2013. Sot, falë Partisë Socialiste, nuk paguan asnjë taksë deri në vitin 2029,” deklaroi ai.
Balla nuk kurseu ironinë ndaj opozitës, duke kritikuar premtimet e tyre për ndryshime fiskale që, sipas tij, janë të paqarta dhe kontradiktore. Ai përmendi me sarkazëm një propozim të kryetarit të PD-së Sali Berisha për rritjen e tavanit të dividentit në 10%, ndërkohë që aktualisht është në nivelin 8%.
“Këto janë ‘programet madhështore’ që po ofrohen,” u shpreh Balla, duke vënë në dyshim seriozitetin dhe qëndrueshmërinë e premtimeve të kundërshtarëve politikë.
Në këtë kuadër, ai përmendi edhe paketën e re të “Paqes Fiskale” të prezantuar këtë javë nga kryeministri Rama, e cila përfshin një amnisti për borxhet e vjetra dhe masa të tjera lehtësuese për të nxitur zhvillimin e mëtejshëm të bizneseve dhe të ekonomisë në tërësi.
