Ditën e sotme, Policia e Korçës ka marrë nën hetim 70-vjeçarin Nevzat Çeço, babai i Martin Çeços.
I moshuari reagoi një ditë më parë pasi Gjykata e Apelit Tiranë liroi me “arrest shtëpiak” tre autorët e dyshuar të ngjarjes së rëndë, që vranë dhe hodhën në rezervuar trupin e të riut pas një konflikti. Ai tha se do hakmerrej duke i djegur me benzinë autorët dhe më pas do vetëflijohej, pasi nuk mund të duronte dot lirimin e autorëve.
“Shërbimet e Komisariatit të Policisë Maliq referuan materialet në Prokurori, ku filloi procedimi penal për shtetasin N. Ç., 70 vjeç, banues në fshatin Kolanec, për veprën penale kanosja serioze për hakmarrje ose për gjakmarrje”, nënvizoi policia.
Më tej në njoftimin zyrtar theksohet se ky kërcënim erdhi pikërisht për shkak të vendimit të Gjykatës:
“Ky shtetas është shfaqur në një video të publikuar dje, në rrjete sociale, duke kanosur për jetën, autorët e dyshuar të vrasjes së djalit të tij (ngjarje e ndodhur në muajin qershor 2022), për të cilët Gjykata e Apelit Tiranë vendosi ndryshimin e masës së sigurisë nga arrest në burg në masën arrest në shtëpi”.
