Në ditën e fundit të fushatës për zgjedhjet e 28 dhjetorit, Ismet Kryeziu, drejtues i Demokracisë në Veprim (DnV), theksoi se fushata ka qenë konkurruese, por me një nivel të ulët entuziazmi nga qytetarët. Sipas DnV-së, pjesëmarrja e qytetarëve ka variuar në mënyrë të konsiderueshme mes subjekteve politike, për nga numri i pjesëmarrësve në aktivitetet e organizuara. Përveç kësaj, kanë qenë të dukshme tendenca të caktuara që kanë ndikuar në cilësinë e fushatës.
Një nga shqetësimet kryesore ka qenë personalizimi i lartë i fushatave, ku liderët dhe kandidatët për kryeministër kanë dominuar aktivitetet, ndërsa kandidatët për deputetë kanë pasur një rol dytësor. Kjo situatë ka kufizuar aftësitë e kandidatëve për të sjellë çështje programore në vëmendjen e publikut. Gjithashtu, DnV vuri re se përfaqësimi i grave ishte i ulët, me një grua folëse për çdo pesë burra, dhe se lista e kandidatëve reflektonte një përfaqësim minimal ligjor, pa ndonjë angazhim serioz për fuqizimin e grave.
Fwushata është përqendruar kryesisht në tema si punësimi, pagat, mirëqenia sociale, arsimi dhe anëtarësimi në NATO. Megjithatë, DnV theksoi se ka pasur përdorim të gjuhës me përmbajtje negative dhe diskriminuese në shkallë më të ulët se në fushatat e mëparshme. Partitë kanë përdorur rrjetet sociale dhe takimet direkte për të komunikuar me elektoratin, por ka pasur edhe rrezik nga dezinformimi dhe thjeshtimi i debatit politik.
Një shqetësim i rëndësishëm është identifikuar në lidhje me pabarazinë në garë, me keqpërdorimin e resurseve publike nga partitë në pushtet për avantazhe elektoral. Ndihma prej 100 eurosh për pensionistët dhe fëmijët, shpallur pak ditë para zgjedhjeve, është theksuar si një rast klasik keqpërdorimi, që mund të minonte besimin e publikut në procesin zgjedhor.
Paneli Zgjedhor për Ankesa dhe Parashtresa është vlerësuar si një aktor kyç për ruajtjen e integritetit të procesit zgjedhor, ndërsa DnV shprehu shqetësime për nivelin e ulët të entuziazmit qytetar për këto zgjedhje.
