Një ngjarje tragjike ka tronditur Tiranën dhe gjithë Shqipërinë, ku 14-vjeçari Martin Cani ka humbur jetën në një sherr me thika, i cili ndodhi pranë shkollës 9-vjeçare “Fan Noli”. Ngjarja e rëndë ka lënë pas dy të tjerë të plagosur dhe një dhimbje të thellë në zemrat e të gjithë ata që e njohën Martinin, një djalë plot shpresë dhe pasion për të ardhmen.
Martin Cani ishte djali i madh i familjes Cani dhe kishte një vëlla më të vogël.
Tragjedia ka shkaktuar një dhimbje të madhe për të afërmit, miqtë dhe shokët e tij, të cilët tani po përpiqen të përballen me humbjen e papritur dhe të padurueshme.
Sot shokët e Martin Canit, të mbushur me lot, kanë vendosur të nderojnë kujtimin e tij në mënyrën më të thjeshtë dhe më të bukur: duke shkuar në shkollë me lule dhe pankarta në duar, duke kujtuar të riun që humbi jetën para kohe.
Autori i këtij akti të tmerrshëm, 15-vjeçari Mario Prelleshi, është arrestuar nga autoritetet dhe do të përballet me pasojat e veprës së tij. Pavarësisht se hetimet janë ende në zhvillim e sipër, ndodhia ka ndezur një debat të gjerë në shoqërinë tonë për dhunën që po shpërthen gjithnjë e më shumë mes të rinjve, duke lënë pas pasojë tragjike dhe të pakthyeshme./ilirianews.al
