Datat e 5, 6 dhe 7 mars njihen si Epopeja e Ushtrisë Çlirimtare të Kosovës, ku vranë anëtarët e familjes Jashari pas rezistencës ndaj forcave të armatosura serbe. Në kuadër të aktiviteteve të Epopesë së Ushtrisë Çlirimtare të Kosovës, krerët e shtetit do të bëjnë homazhe në në kompleksin memorial “Adem Jashari” në Prekaz. Mësohet se gjatë ditës do të ketë homazhe nga komunat në të gjithë komplekset memoriale të dëshmorëve si dhe do të organizohet akademi përkujtimore në Prishtinë për Epopenë e UÇK-së.
Axhenda:
E enjte, 6 mars
10:00 Krerët e shtetit homazhe në Kompleksin memorial “Adem Jashari” në Prekaz Homazhe nga komunat në të gjitha komplekset memoriale të dëshmorëve Parakalimi i motorklubeve në Skënderaj;
10:00 Homazhe nga komunat në të gjitha komplekset memoriale të dëshmorëve;
12:00 Parakalimi i motorklubeve në Skënderaj;
19:00 Akademi përkujtimore për Epopenë e UÇK-së në Prishtinë.
E premte, 7 mars
19:00 Ndezja e flakadanëve në shtatë rajone të Republikës së Kosovës;
19:00 Nata e zjarreve në Prekaz;
19:30 Programi artistik në Sheshin “Adem Jashari” në Skënderaj.
Familja Jashari
Që nga viti 1991 deri më 1998, Prekazi dhe Drenica ishin të rrethuar nga forcat paramilitare serbe. Synimi ishte vrasja e komandantit të Ushtrisë Çlirimtare të Kosovës, Adem Jashari dhe familjes së tij, për të shuar dhe shtypur rezistencën që familja Jashari me në krye Ademin e Hamzën po ia bënin regjimit të Sllobodan Millosheviç.
Më 30 dhjetor të vitit 1991 kryhet sulmi i parë ndaj familjes Jashari. Ndërsa sulmin e dytë forcat paramilitare serbe e kryen në muajin janar, 1998. Më 22 janar forcat serbe sulmuan familjen Jashari, por edhe kësaj beteje, fëmijët dhe gratë e familjes Jashari i rezistuan. Megjithatë, në këtë betejë që zgjati afër 30 minuta, të plagosura mbeten Iliriana, vajza e Rifat Jasharit dhe Selvetja, vajza e Hamzë Jasharit.
Pas këtij sulmi, familjes Jashari i erdhën miq, shok e bashkëkombës për t’u solidarizuar me ta. Ata i kërkuan kryefamiljarit Jashari që t’i tërheqin gratë dhe fëmijët nga aty. Por, edhe gratë dhe fëmijët kishin marr vendimin që të qëndrojnë, duke thënë se “po të vriten djemtë, nuk na vyen jeta të jetojmë”.
Dhe vendosen të qëndrojnë, qëndruan për t’i treguar botës se shqiptarët nuk shkojnë askund përtej truallit dhe shtëpive të tyre, shkruan KosovaPress. Sulmi i tretë, që ndodhi më 5, 6 dhe 7 mars të vitit 1998, mori jetën e 55 njerëzve në fshatin Prekaz, 22 prej të cilëve ishin familjarë të ngushtë të Adem Jasharit. Këtij sulmi i mbijetoi vetëm Bashkimi, djali i Rifatit, i cili ia del që mes datës 5-6 mars të largohet nga rrethina dhe arrin t’i shpëtojë sulmit, si dhe Besarta, vajza e Hamzës, e cila pa dhe përjetoj tmerrin derisa vriteshin anëtarët e familjes së saj.
