Më 5 shtator 2023, u shënua 28-vjetori i vdekjes së Shën Nënë Terezës, humanistes shqiptare dhe fituese e Çmimit Nobel për Paqe. Ajo është njohur për veprat e saj altruiste dhe përkushtimin ndaj të varfërve. Nënë Tereza, emri i plotë i së cilës është Anjezë Gonxhe Bojaxhiu, lindi më 26 gusht 1910 në Shkup dhe ndërroi jetë më 5 shtator 1997 në Kalkutë, Indi.
Me fjalët e saj të famshme: “Me gjak, unë jam shqiptare. Me shtetësi, jam indiane. Me besim, unë jam një murgeshë Katolike. Sipas profesionit tim, unë i përkas botës”, ajo shpreh identitetin e saj multikulturor dhe universin e saj shpirtëror. Ajo gjeti njohje të madhe gjatë jetës së saj për përkushtimin ndaj ndihmës për ata në nevojë dhe u shpall shenjtore nga Papa Françesku më 5 shtator 2016, pas një ceremonie madhështore në Sheshin “Shën Pjetri” në Vatikan.
Për shenjtërimin e saj, u njohën dy mrekulli të rëndësishme. E para ishte dëshmia e Monika Besra, një nënë që tha se lutjet e saj pranë ikonës së Nënë Terezës e shëruan nga një tumor në stomak. Mrekullia e dytë, e njohur nga Papa Françesku në vitin 2015, vinte nga një 25-vjeçar brazilian i cili po ashtu e shpalli shërimin nga një tumor në tru falë Nënë Terezës.
Pas vdekjes së saj, Papa Gjon Pali II e shpalli mrekullinë e parë në tetor 2003, ndihmuar kështu në procesin e shenjtërimit të saj. Po ashtu, Asambleja e Përgjithshme e Kombeve të Bashkuara shpalli 5 Shtatorin si Ditën Ndërkombëtare të Bamirësisë, në nder të qëllimeve humanitare të Nënë Terezës dhe veprave të saj për të ndihmuar të varfrit dhe të sëmurët.
Nënë Tereza mbetet një figurë e admiruar dhe inspiruese në të gjithë botën, duke vazhduar të shërbejë si simbol i dashurisë dhe altruizmit.
