Një lokal veror në bregdetin e Darëzezës, në Fier, ka shpërthyer në flakë rreth orës 17:30 të ditës së sotme. Zjarri u vërejt fillimisht nga banorët e zonës, të cilët njoftuan menjëherë shërbimet zjarrfikëse, që arritën të shuajnë flakët.
Megjithatë, për shkak të ndërtimit të lokalit me dru, ai u përfshi nga zjarri shumë shpejt, duke u shkatërruar brenda disa minutash, ndonëse banorët ndërhynë me mjete rrethanore.
Lokali, i cili ishte në pronësi të shtetasit A. B., ishte në funksionim për pesë vjet gjatë sezonit veror. Dëmi i shkaktuar nga zjarri është i përllogaritur në 3 milionë lekë, ku janë shkatërruar të gjitha pajisjet, 120 shezlongë dhe 60 çadra.
Dyshohet se zjarri ka shpërthyer aksidentalisht, pasi banorët përreth kanë raportuar se ka pasur vizitorë që konsumonin birra dhe cigare. Energji elektrike në lokal ishte e ndërprerë që pas përfundimit të sezonit veror. Grupi hetimor pritet të kryejë verifikimet e nevojshme për zbardhjen e ngjarjes.
