Ngjarja e sotme mund të cilësohet padyshim si me e jashtëzakonshmja në historinë e Kuvendit të Shqipërisë. Salla ka parë sherre, plagosje në vitet e para dhe shumë akte të tjera, por kurrë një ministre që merr fjalën me inteligjencë artificiale.
Gjithçka ka nisur kur kryeministri Edi Rama mori fjalën në foltore dhe kërkoi nga shërbimet e Kuvendit që të lejonin dhe prezantimin e Diellës, sepse me dekret të Presidentit, përgjegjësit dhe kompetencat për ministren virtuale i ka kreu i qeverisë.
“I keqardhur për Diellën si ministre. Duke qenë se Diella është e emëruar me dekretin e Presidentin si përgjegjësi e imja, para se të vazhdoj më tej, kërkoj nga shërbimi t’i japë fjalën asaj”, u shpreh Edi Rama dhe menjëherë në ekranet e televizorëve u shfaq Diella.
Nisja e fjalës së saj ka ngjallur neveri tek anëtarët e opozitës, të cilët menjëherë kanë vendosur të braktisin sallën.
Kamerat kanë fiksuar liderin demokrat Sali Berisha dhe disa nga deputetët e tjerë, të cilët lanë karriget dhe dolën menjëherë nga salla, kurse të tjerët që mbetën vazhduan protestën duke u rënë tavolinave. Deputeti lushnjar Saimir Korreshi u ngrit nga vendi i tij dhe tentoi “ti mbyllte gojën” ministres virtuale.
Ai shkoi në një nga televizorët që ndodhen përballë sallës së seancës plenare dhe i mbylli zërin ministres virtuale. Sapo ajo përfundoi, në Kuvend nisën debatet dhe kryetari Niko Peleshi vendosi 5 minuta pushim me kërkesë të grupit të Partisë Socialiste.
