Spermë e një dhuruesi, mbartëse e një mutacioni të rrezikshëm të kancerit, ka sjellë në jetë të paktën 197 fëmijë në Europë, disa kanë vdekur
Një hetim i përbashkët i 14 organizatave mediatike, mes tyre edhe BBC, zbuloi se një dhurues sperme, i cili pa dijeninë e tij ishte mbartës i një mutacioni gjenetik shumë agresiv ka përdorur materialin e tij riprodhues për të sjellë në jetë të paktën 196–197 fëmijë në shumë vende të Europës. Disa prej këtyre fëmijëve kanë ndërruar jetë.
Sipas BBC-së, mutacioni prek gjenin TP53, i cili ndalon shndërrimin e qelizave në kancer. Edhe pse vetë dhuruesi nuk ishte i sëmurë, rreth 20% e spermës së tij mbante mutacionin që shkakton sindromën Li-Fraumeni, një gjendje që u jep fëmijëve deri në 90% gjasë të zhvillojnë kancer gjatë jetës, shpesh që në fëmijëri.
“Kjo është një diagnozë e tmerrshme… një barrë e përjetshme për çdo familje,” deklaroi për BBC-në genetistja e kancerit në Londër, Clair Turnbull.
Spermë e përdorur për 17 vite
Dhuruesi ishte një student i paguar që nisi të jepte spermë në vitin 2005. Materiali i tij u përdor për gati 17 vjet nga klinika të ndryshme të fertilitetit. Ai kishte kaluar testet standarde, por mutacioni i tij ishte i paidentifikueshëm pa analiza shumë të avancuara.
Banka Evropiane e Spermës kërkoi ndjesë, duke thënë se mutacioni nuk mund të zbulohej paraprakisht dhe se dhuruesi u përjashtua menjëherë sapo doli në pah problemi.
Fëmijë që u diagnostikuan me kancer, disa kanë vdekur
Rasti u zbulua kur mjekë nga vende të ndryshme raportuan fëmijë të sëmurë me kancer, të lidhur me të njëjtin dhurues. BBC raporton:
“Hetimi zbuloi se numri total është të paktën 197 fëmijë… disa kanë zhvilluar dy lloje kanceri dhe disa kanë vdekur në moshë shumë të vogël.”
Genetisti Edwin Caspar nga Spitali Universitar i Rouen tha se situata është alarmante dhe raste të tjera mund të zbulohen në vitet në vijim.
Historia e ‘Céline’
BBC sjell edhe rrëfimin e “Céline”, një nëne franceze, vajza e së cilës, e lindur nga sperma e dhuruesit 14 vite më parë, rezultoi me mutacionin. Klinikë në Belgjikë e kontaktoi urgjentisht për testime.
Ajo shprehet pa mllef ndaj dhuruesit, por i revoltuar nga klinikat:
“Më dhanë spermë që nuk ishte e sigurt. Nuk ishte e pastër.”
Sa i përket të ardhmes së vajzës së saj, ajo shton me frikë dhe vendosmëri:
“Nuk e dimë kur, nuk e dimë kush dhe nuk e dimë sa. Por nëse ndodh, do të luftojmë. Dhe nëse ndodh shumë herë, do të luftojmë shumë herë.”
