Përplasjet e dhunshme kanë shpërthyer këtë të hënë në ishullin e Kretës, ku protesta e fermerëve grekë ka arritur një përmasa të paprecedentë. Turma të mëdha protestuesish janë përballur me forcat policore pranë aeroporteve të Haniasë dhe Iraklios, duke shkaktuar tensione që kanë tronditur vendin për disa javë. Në Hania, protestuesit thyen kordonin policor, përmbysën një automjet policie dhe detyruan njësitet speciale të tërhiqen, ndonëse forcat e rendit përdorën gaz lotsjellës për të shpërndarë turmat.
Ngjarje të ngjashme ndodhi edhe në Iraklion, ku disa protestues arritën deri në pistën e aeroportit, duke shkaktuar mbylljen e tij përkohësisht. Kjo protestë është pjesë e një lëvizjeje më të gjerë që është duke u zhvilluar në të gjithë Greqinë që nga fund-nëntori, me fermerët që kërkojnë përshpejtimin e subvencioneve të Bashkimit Evropian dhe uljen e kostove të prodhimit. Ata akuzojnë qeverinë për shpërndarje të padrejtë të ndihmave financiare, të cilat, sipas tyre, po shkojnë vetëm për individë të lidhur me pushtetin.
Në veri të Greqisë, bllokadat vazhdojnë në doganën e Promahonas me Bullgarinë dhe në autostradën Egnatia, si dhe në Kardhicë dhe Thesali, ku qindra traktorë po mbajnë të paralizuara rrugë strategjike. Në disa zona, protestat kanë karakter simbolik, ndërsa në të tjera ato kanë degjeneruar në përplasje të hapura me policinë.
Kryeministri Kyriakos Mitsotakis ka kërkuar nga fermerët të ulin tonet e protestave, duke premtuar se pagesat e subvencioneve dhe masat mbështetëse do të realizohen brenda dhjetorit. Megjithatë, protestuesit kanë paralajmëruar se do të intensifikojnë aksionet nëse kërkesat e tyre nuk përmbushen menjëherë. Situata mbetet e tensionuar në shumë zona të vendit, dhe autoritetet presin që protestat të përshkallëzohen edhe më tej, në një nga mobilizimet më serioze të fermerëve në vitet e fundit.
