Mediat izraelite i kanë kushtuar një artikull të veçantë kapitenit shqiptar Arben Anamali, i cili humbi jetën në liqenin e Shkodrës teksa shpëtoi dy turistë izraelitë nga mbytja. “The Jerusalem Post” shkruan se Anamali ndërhyri me guxim për t’u ardhur në ndihmë dy shtetasve izraelitë që kishin injoruar paralajmërimet e tij për rreziqet e rrymave të forta në liqen.
Kapiteni shqiptar drejtonte një anije turistike që operon në zonën veriore të liqenit dhe atë ditë kishte në bord shtatë turistë izraelitë. Dy prej tyre u hodhën në ujë pavarësisht paralajmërimeve. Ata u përfshinë shpejt nga rrymat dhe u gjendën në rrezik për jetën.
Sipas “Jerusalem Post”, u hodhën jelekë shpëtimi, përfshirë edhe të kapitenit, por pa sukses. Në përpjekje për t’i shpëtuar, Anamali u hodh në ujë, arriti t’i çonte pranë anijes dhe t’i ndihmonte të ngjiteshin mbi të, por më pas u zhduk nën ujë.
Trupi i tij u gjet pas afro 48 orësh kërkime. Dyshohet se ka pësuar arrest kardiak për shkak të lodhjes ekstreme gjatë aktit heroik. Ai la pas dy fëmijë.
Sipas “Albanian Times”, qeveria shqiptare e ka shpallur pas vdekjes “Dëshmor i Kombit”, një nga titujt më të lartë që u jepet qytetarëve për akte të guximshme. Në ditët në vijim pritet të mbahet edhe një ceremoni zyrtare përkujtimore në nder të tij.
