Një tjetër atentat tronditi Tiranën pasditen e kësaj të diele, ku 50-vjeçari, Alfred Dedja mbeti i vdekur pasi u qëllua me armë zjarri nga shtetasi Julian Gjoshi.
E gjithë ngjarja ndodhi rreth orës 15:30 në një lokal në fshatin Ndroq, ku 50-vjeçari ishte duke konsumuar kafen. Siç dhe bëmë me dije më herët Julian Gjoshi u fut në ambientet e lokalit dhe hapi zjarr ndaj 50-vjeçarit i cili fatkeqësisht si pasojë e plagëve të marra humbi jetën në vendin e ngjarjes. Ndërkohë, autori arriti të largohej me një automjet tip “Benz ML”, ngjyrë të zezë.
Deri me tani dyshohet se shkak i kësaj ngjarje të rëndë të jetë bërë prishja e pazareve të drogës.
Por, kush është Alfred Dedja, 50-vjeçari i cili u qëllua për vdekje këtë të diel?
Burime për mediat bëjnë me dije se në vitin 2014, ky shtetas ka rënë në prangat e bluve pasi akuzohej për vjedhje. Ai u arrestua në ambientet e spitalit “Nënë Tereza”, në kryeqytet, pasi dyshohej se kishte thyer xhamat e disa automjeteve të parkuara, duke vjedhur edhe sendet personale dhe një shumë parash.
Ai rezultoi të ishte autor i mbi 15 vjedhjeve të ndodhura dhe kishte marrë shuma të mëdha parash, sende personale, çanta, lap-top etj, materiale të cilat gjendeshin në brendësi të makinave të vjedhura. Mësohet se Dedja i kryente vjedhjet në makinat që u përkisnin të afërmve të pacientëve që ishin shtruar në spital.
Ndërsa në vitin 2017, është vënë në pranga për trafik të lëndëve narkotike. Gjatë një operacioni të zhvilluar në Mat, në kuadër të të cilit u sekuestruan 6 kg kanabis, policia arrestoi tre persona, mes tyre edhe Alfred Dedja.
Kush është autori Julian Gjoshi, 27-vjeçari nga Shijaku emri i të cilit del në SKY ECC?
Julian Gjoshi, 26-vjeç, ose i njohur ndryshe si i “forti i Shijakut”, rezulton të jetë një person me rekorde kriminale. Burime për mediat bëjnë me dije se emri i tij figuron edhe në përgjimet e aplikacionit famëkeq “SKY ECC”, ky dyshohet se favorizohet për lirimin e tij nga burgu vite më parë, pasi ishte arrestuar për “armëmbajtje pa leje”.
JA ÇFARË THA POLICIA MË HERËT:
Tiranë/Informacion paraprak
Më datë 01.12.2024, rreth orës 15:30, në një lokal në Ndroq, në rrethana ende të paqarta është vrarë me armë zjarri shtetasi A. D., rreth 50 vjeç.
Autori është identifikuar nga shërbimet e Policisë dhe një grup i posaçëm hetimor, në drejtimin e Prokurorisë, po vijon punën për zbardhjen e plotë rrethanave të ngjarjes, dokumentimin e plotë ligjor të saj dhe kapjen e autorit të dyshuar.
