Policia e Tiranës ka zbardhur atentatin e ndodhur më 3 shtator 2024 në zonën e “Don Boskos” ku mbetën të plagosur me armë zjarri Ronaldo Metushi dhe Kastriot Elezaj.
Denis Tahiri, 23 vjeç është shpallur në kërkim si autor i dyshuar i atentatit.
Policia arriti ta identifikojë 23-vjeçarin nga Kamza falë targës së mjetit të përdorur në ngjarrje. Fillimisht policia zbuloi se kujt i përkisnin targat e mbivendosura dhe pasi mori në pyetje pronarin e makinës, rezultoi se ai ia kishte dhënë me qira Denis Tahirit.
Më pas rezultoi se ky i fundit, kishte pak ditë që e kishte marrë makinën me qira dhe targat ia kishte vendosur mjetit tip Golf 5 që autorët dogjën pas krimit.
Po ashtu shenjat e gishtave të tij kanë ndihmuar edhe në përforcimin e dyshimeve të policisë, pasi u krahasuar me ato të gjetura në mjet.
Dyshohet që 23-vjeçari të jetë brenda territorit shqiptar, por ende nuk është mundur të arrestohet.
Çfarë ndodhi më 3 shtator
Dy të plagosurit, Ronaldo Metushi dhe Kastriot Elezaj, po pinin kafe në momentin e ngjarjes. Ronaldo Metushi mori plumb në këmb, ndërsa Kastriot Elezaj në gjoks.
Në dëshminë e tyre ata kanë mohuar të kenë patur konflikte me persona të tjerë gjatë kohëve të fundit.
Megjithatë, grupi hetimor ka dyshime se objektiv i sulmit ishte 45-vjeçari Elezaj, për shkak të konflikteve që mund të ketë patur nga e kaluara. Më herët ai ka qenë i dënuar për prostitucion në Itali, krim për të cilin ka vuajtur edhe dënimin në vendin fqinj.
Asnjëri prej të plagosurve nuk ruhej dhe nuk kishte frikën e një atentati të mundshëm. Sipas dëshmisë së tyre, lëvizjet nëpër Tiranë i kishin normale dhe të përditshme.
