Bisedimet e tensionuara në Gjenevë mes Ukrainës dhe Rusisë janë mbyllur pa një marrëveshje konkrete për fatin e territoreve të pushtuara. Nën ndërmjetësimin e emisarëve të Donald Trump, palët arritën të dakordësohen vetëm për një mekanizëm monitorimi të armëpushimit.
Presidenti Volodimir Zelenski deklaroi se qëndrimet mbeten ende shumë larg, sidomos për rajonin e Donbasit dhe centralin e Zaporizhias. Kievi zyrtar refuzon prerë dorëzimin e tokave të tij, duke kërkuar garanci të forta sigurie nga perëndimi.
Zelensky shtoi se nuk është e drejtë që Presidenti i SHBA-së Donald Trump vazhdon të bëjë presion mbi Kievin dhe jo mbi Moskën, për të bërë lëshime për paqen. “Shpresoj të jetë thjesht taktika e tij dhe jo vendimi”, u shpreh Zelensky.
Nga ana tjetër, kreu i delegacionit rus u shpreh pas negociatave, se këto të fundit kishin qenë të vështira por eficente, siç u shpreh ai, duke bërë më pas me dije se negociata të tjera do të mbaheshin në të ardhmen. Moska kërcënon me marrjen e kontrollit të plotë të lindjes me forcë, nëse nuk arrihet kompromis në tryezë, me zëdhënësen e Kremlinit, Maria Zakharova që ironizoi në një dalje për mediat pas përfundimit të bisedimeve, duke mohuar çdo mundësi që Ukraina të riarmatoset gjatë armëpushimit nëse arrihet.
SHBA po tenton me çdo kusht t’i japë fund luftës katërvjeçare që ka shkaktuar me mijëra viktima dhe shkatërrim masiv. Megjithatë, një dritë jeshile është dhënë vetëm për procesin e shkëmbimit të të burgosurve që pritet të ndodhë së shpejti.
