Pas kaosit të shkaktuar ditën e djeshme në Parlament, opozita ka bojkotuar komisionet parlamentare ditën e sotme.
Në mbledhjen e Komisionit për Politikën e Jashtme, karriget e deputetëve të opozitës ishin bosh.
Edhe në Komisionin Hetimor të Sterilizimit dhe Check-Up opozita mungoi.
Në mungesë të kryetares Albana Vokshi, mbledhja po drejtohet nga nënkryetari Plarent Ndreca.
“Sot është mbledhja e radhës e dakordësuar edhe me kryetaren e Komisionit, edhe me përfaqësuesit e opozitës, me vendimmarrje përkatëse nga Komisioni. Ky është zbatim i vendimit për thirrjen e dëshmitarëve.
Kemi detyrimin të vijojmë mbledhjen në respekt të vendimmarrjes që kemi marrë si Komision. Me keqardhje për mosprezencë të opozitës, por është vendimmarrje politike, as nuk na përket dhe as nuk duhet t’i përkasë këtij komisioni”, tha ai.
Mungesa e tyre është vijim i aksionit opozitar për dënimin me një vit burg të deputetit Ervin Salianji.
Fillimisht kaosi nisi me bllokimin e foltores, hedhjen e sendeve të forta në drejtim të kryetares së Kuvendit e deri te djegia e karrigeve jashtë ambienteve të Kuvendit. Rrëmujës së opozitës më tej iu bashkua edhe deputetja e PL, Monika Kryemadhi, si edhe Vangjel Dule.
Pasi i nxorrën karriget e kuvendit në oborr, me benzinën e fshehur në çantën e Elda Hotit, Flamur Noka spërkati karriget me lëndën djegëse, ndërsa flakën ia vuri Bledion Nallbati.
