Vetëm pak minuta përpara se Donald Trump të publikonte një mesazh ku fliste për një armëpushim të mundshëm me Iranin, në tregjet financiare amerikane u regjistruan lëvizje të pazakonta që tërhoqën vëmendjen e analistëve. Transaksione të mëdha në kontratat e ardhshme të indeksit S&P 500 dhe në tregun e naftës ngritën dyshime nëse disa investitorë kishin informacion të hershëm mbi zhvillimet politike.
Pas një periudhe të vështirë për bursën amerikane, e ndikuar nga tensionet dhe luftimet që përfshinin Shtetet e Bashkuara dhe Izraelin, tregu reagoi me një rikuperim të fortë. Paralelisht, çmimet e naftës pësuan rënie, ndërsa disa investitorë realizuan fitime të konsiderueshme falë pozicioneve të hapura vetëm pak çaste përpara njoftimit të Trump.
Rasti më i komentuar lidhet me një pozicion masiv, rreth 1.5 miliardë dollarë në kontrata futures të S&P 500, një nga treguesit kryesorë të bursës amerikane. Sipas analizës së publikuar nga Kobeissi Letter, një kompani që monitoron dinamikat e tregjeve globale, kjo lëvizje ishte aq e madhe sa ndikoi menjëherë në rritjen e indeksit me rreth 0.3% brenda një minute.
Vetëm 14 minuta më pas, në një postim publik, Trump deklaroi se po zhvilloheshin “bisedime produktive” me Iranin. Reagimi i tregut ishte i menjëhershëm: brenda pak minutash kapitalizimi total i S&P 500 u rrit me rreth 2 trilionë dollarë.
Sipas të njëjtave burime, investitori apo grupi që kishte hapur pozicionin e madh arriti të gjenerojë fitime rreth 50 milionë dollarë në një kohë shumë të shkurtër, duke nxitur debat mbi kohën e transaksioneve dhe mundësinë e aksesit në informacion të privilegjuar.
Këto zhvillime kanë shtuar pikëpyetjet mbi transparencën në tregjet financiare dhe mbi mënyrën se si lajmet politike me ndikim global mund të krijojnë luhatje të forta, të cilat për disa aktorë mund të përkthehen në përfitime të menjëhershme.
