Avokati Redon Meksi deklaron se çdo politikan mund të shkojë në SPAK për shit-blerjen e votës dhe se strategjia kundër krimit zgjedhor nuk është risi.
Duke folur për “MCN Live” lidhur me takimin e një dite më parë të kreut të SPAK, Altin Dumani me gazetarët, ai tha se strategji kemi pasur çdo vit zgjedhor për të parandaluar shit-blerjen e votës, duke ngritur pikëpyetjen se pse kjo strategji bëhet katër muaj para zgjedhjeve.
Sipas tij, duket se një strategji e tillë pak muaj para zgjedhjeve, bëhet sa për të qenë formal.
Ndër të tjera ai shtoi se Prokuroria e Posaçme ka stepje sa i takon çështjeve të nxehta.
“Sa i takon çështjeve të nxehta, kuptoj që ka stepje nga SPAK. Nga njëra anë Ilir Meta që nuk është në detyrë është në burg, ndërsa Erion Velaij që rrezikon të prishë provat nuk është në burg.
Kjo tregon se për disa veprohet ndryshe dhe për disa të tjerë ndryshe. Problemi është qe Veliaj ka treguar se përdor haptazi pozicionin e tij për të ndikuar në zgjedhje.
Duhej pezulluar, ndaluar, madje dhe arrestuar. Kemi bashkëshorten e tij që ka ikur jashtë shtetit. Ka shumë dritë-hije, sidomos çështja Veliaj.
SPAK dhe prokuroritë në Shqipëri kanë një problem që për disa vepra e nisin hetimin kryesisht dhe për disa të tjera presin denoncimin.
Marrim rastin e Erion Veliajt që ishte një denoncim nga Nesti Angoni që të niste hetimi.
Veliaj ka bërë haptas letrat dhe mund të hetohet kryesisht. Kjo lë dyshime për mënyrën se si mund të veprohet.
Sa i takon zgjedhjeve ajo që SPAK mund të bëjë është t’i fusë frikën politikës që të mos arrijnë te blerja e votave
Ne kemi rastin e Ulsi Manjës që sot është ministër Drejtësie që ka blerë haptas vota dhe iu pushua çështja për shkelje afatesh.
Ndërsa lidhur me deklaratën e Dumanit se për inceneratorin e Tiranës janë në fazën e hetimeve paraprake, Meksi tha se një hetim i tillë nuk mund të ndodhë pesë vjet pas skandalit.
Meksi shtoi se duke e ndarë çështjen e inceneratorëve në pjesë, heq edhe grupin e strukturuar kriminal.
Të marrim të mirëqenë që Veliaj nuk ka bërë asnjë shkelje, që 9 drejtorët që ka në burg, kanë vepruar pas kurrizit të tij, atëherë je i paaftë dhe duhet të ikësh si kryetar bashkie.
Në rastin më të mirë duhet të ikë si kryetar bashkie, në rastin më të keq duhet të shkojë në burg. Për mua Veliaj e ka vulosur fatin politik.
Ka zëra se bashkëshortes së tij, Ajola Xoxës, i janë gjetur në telefon blerje për rroba dhe bizhuteri në vlerë 1 milion euro.
Është një standard i dyfishtë nga SPAK, që për disa dosje i nxjerr të dhënat, të tjerëve jo.
Disave iu nxjerr dhe vibratorët që iu gjenden në shtëpi si Arben Ahmetaj, ndërsa për të tjerët jo.
Pse informacionet nga dalin? Nga i merr media informacionet?“
